A curta de animación universitaria que chegou aos Mestre Mateo

Nuno é a historia dun bebé que non entende por que os seus pais lle falan diferente a el: en galego entre eles, pero en castelán con el. Sóache? Baseada nun relato do libro Made in Galiza de Séchu Sende, esta curtametraxe de animación aborda sen dramatismos a diglosia que segue marcando moitísimas casas do país. Desde os ollos dun cativo, retrata con tenrura e precisión a realidade sociolingüística que viven milleiros de familias galegas.

Detrás de Nuno están Antía Iglesias e Martín Joga, dous egresados do Grao en Creación Dixital, Animación e Videoxogos da UDC. Antía asumiu a dirección, a produción, a animación en 2D e o compositing; Martín conceptualizou as contornas, liderou o arte 3D e o deseño de son. Xuntos escribiron o guión. A banda sonora orixinal é de Dani Cornes, músico e creativo audiovisual.

Estamos ante unha animación frame a frame executada por só dúas persoas nun calendario universitario. Ese método case artesanal é o que lle confire o seu estilo tan singular: a combinación entre o 2D feito a man de Antía e os escenarios 3D de Martín constrúe un mundo recoñecible e cálido no que o espectador entra na familia desde o primeiro fotograma.

O recoñecemento non tardou en chegar. Nuno foi finalista a Mellor Curtametraxe de Animación nos Premios Mestre Mateo —o maior galardón da Academia Galega do Audiovisual—, e foi seleccionada na Sección Made in OU do OUFF, na Sección Novas Camadas do Festival de Cans e no Festival de Belalcázar, dando o salto fóra de Galicia.

Produciós OU ké! asumiu a produción executiva e a distribución estratéxica da curta: festivais, contacto con programadores, exhibicións en centros culturais, e a produción de contidos para redes sociais que está a permitirlle a Nuno chegar moito máis lonxe que calquera TFG.